11  Mart 2013-cü il

QHT Əməkdaşlıq Alyansı martın 11-də, Park İnn hotelinin “Dan Ulduzu” konfrans zalında Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Beynəlxalq təşkilatların yerli QHT-lərlə əməkdaşlığının gücləndirilməsi”  mövzusunda Forum keçirib.

Forum beynəlxalq təşkilatların və missiyaların  müxtəlif baxışları bölüşən yerli QHT-lər arasında əməkdaşlığının genişləndirilməsi vacibliyini önə çəkib.

Forumda Beynəlxalq təşkilatların insan haqları, fundamental azadlıqlar barədə hər il yayılan hesabatları da müzakirə predmeti olub. Olkəmizdə proseslərin obyektiv qiymətlədirilməsi məqsədilə  yalnız müxalif mövqeli QHT-lərlə deyil, eyni zamanda müxtəlif siyasi görüşləri paylaşan, ən fərqli düşüncədə olan QHT-lərin  məlumatlarına da istinad edilməsi vurğulanıb. Bu məsələ ona görə önəmli hesab edilib ki, beynəlxalq təşkilatların hesabatları hakimiyyət tərəfindən birmənalı  rədd edilməsin, əksinə  tənqiddən  düzgün nəticə çıxarılaraq sadalanan nöqsanlar aradan qaldırılsın. Bu vəziyyət qarşılıqlı ittihamlara deyil, beynəlxalq təşkilatlarların dövlətlə və QHT-lərlə normal ünsiyyətinə rəvac  versin və sonucda hər üç tərəf arasında körpü yaratsın və dialoqa yol açsın.

QHT Əməkdaşlıq Alyansının həmsədri Rufiz Qonaqovun açılış nitqindən sonra Forumda  “Azərbaycan vətəndaş cəmiyyəti və beynəlxalq təşkilatlar arasında əməkdaşlığın gücləndirilməsi istiqamətində qarşıda duran vəzifələr” mövzusunda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev,

“Azərbaycan QHT-ləri və beynəlxalq təşkilatlar arasında əməkdaşlıq üçün istifadə olunmamış resurslar və potensial; təkliflər” mövzusunda QHT Əməkdaşlıq Alyansı, “Region” Beynəlxalq Analitik Mərkəzin rəhbəri, Razi Nurullayev,

”Beynəlxalq təşkilatlar və Azərbaycanın vətəndaş cəmiyyəti arasında əməkdaşlığın gücləndirilməsi vacibliyini şərtləndirən amillər” mövzusunda millət vəkili, Vahid Əhmədov,

“Dövlət-QHT Əməkdaşlığı: Mərakeş təcrübəsi” mövzusunda Mərakeş Krallığının Azərbaycan Respublikasındakı səfiri, Səfir Hassan Hami,

“Azərbaycan hökümətinə demokratiya və idarəetmə üzrə götürdüyü öhdəliklərin yerinə yetirilməsində vətəndaş cəmiyyətinin rolu” mövzusunda USAID/Azərbaycan ofisinin Demokratiya və İdarəetmə İdarəsinin direktoru, cənab Ronald Glass,

“QHT-lərin iqtidaryönlü və müxalifyönlü kateqoriyalara bölünməsi: bunun beynəlxalq təşkilatlar və hakimiyyət arasında yaratdığı problemlər” mövzusunda QHT Əməkdaşlıq Alyansının həmsədri Yadigar Məmmədli,

“Beynəlxalq təşkilatlar, nümayəndəliklər və QHT-lər arasında münasibətlər” mövzusunda İraqın Azərbaycandakı səfiri, Səfir Heydar Şiya Ghubeşi ALBARRAK,

“Vətəndaş cəmiyyəti üzvləri arasında konsolidasiya problemləri” mövzusunda QHT Əməkdaşlıq Alyansının həmsədri Rəfail Becanov,

“Beynəlxalq təşkilatlar ilə informasiya mübadiləsinin asanlaşdırılması yolları” mövzusunda Humanitar Tədqiqatlar Cəmiyyətinin sədri Əvəz Həsənov,

“Beynəlxalq” və “milli” parametrlərin uyğunlaşdırlması: sabaha doğru” mövzusunda isə beynəlxalq ekspert, Uldis Villerušs (Latviya) məruzə ilə çıxış ediblər.

Sonda məruzələr ətrafında  geniş müzakirələr aparılıb və növbəti addımların müəyyən edilməsi üçün Bəyannamə qəbul edilib.

Qeyd edək ki, Forumda 40 yaxın beynəlxalq təşkilatlaırn və səfirliklərin nüümayəndəsi, 10-dan çox millət vəkili, onlarla aparıcı mətbuat orqanlarının baş redaktorları və rəhbərləri və yüzlərlə vətəndaş cəmiyyəti təmsilçiləri iştirak ediblər.

Daha çox şəkillərlə bu linkdə tanış ola bilərsiniz: http://www.facebook.com/media/set/?set=a.499714213399350.1073741827.425881430782629&type=1&l=15f136b18c